हैजा के हो ? कसरी बच्ने ?
हैजा भिब्रियो कलेरा नामक ब्याक्टेरियाका कारण हुने सरुवा रोग हो । भिब्रियो कोलेराले आन्द्रामा संक्रमण गर्दा हैजा लाग्छ । यो जीवाणुको सङ्क्रमण भएको केही घण्टादेखि पाँच दिनभित्र यसका लक्षणहरू देखिन्छन्।
हैजा लागेपछि धेरै पटक चौलानी पानीजस्तो पातलो दिसा र वान्ता भइरहन्छ । यो वर्षायाम तथा गर्मीमा बढी हुने गर्छ । हैजाको संक्रमण फैलने प्रमख कारक दुषित पानी हो । हैजा लागेको व्यक्तिको वान्ता र दिशापिसाबाट यो रोग सर्छ ।
लक्षण
लगातार पातलो दिसा र वान्ता भइरहनु ।
दिसामा मासी तथा रगतको अंश देखिन थाल्नु ।
वान्ता समेत पातलो चौलानी रङ जस्तो आउन थाल्नु ।
शरीरको तापक्रम घट्नु ।
रक्तचाप घट्नु ।
शरीरमा पानीको कमी हुनु, तिर्खा लागिरहनु ।
पानीको कमीका कारण पिसाब कम हुनु ।
पेट तथा खुट्टाका मांसपेशी बाउडिने ।
श्वासप्रश्वासको गति बढ्ने, कमजोरी महसुस हुने, रिङ्गटा लाग्ने
रोकथामका उपाय
पानी राम्ररी उमालेर मात्रै पिउने ।
खाना खानुअघि र दिसा गरेपछि साबुनले हात धुने ।
घर वरिपरि किटनासक औषधि छरी सफा राख्ने ।
बासी, सडेगलेको र खुला राखिएका खानेकुरा नखाने ।
बिरामीको दिशा पिसाब तथा वान्तालाई घरबाट टाढा सुरक्षित स्थानमा गाड्ने ।
जथाभावी दिशापिसाब नगर्ने, चर्पी नभएमा खाल्डो खनेर दिसापिसाब माटोले पुर्ने ।
राम्रोसँग नपाकेका खानेकुरा नखाने ।
काँचै खाइने खानेकुरा राम्ररी पखालेर मात्र खाने ।
घरमै बनेको झोलीलो खानेकुरा, दालको रस, गेडागुडी प्रशस्त मात्रामा खाने ।
सरसफाईमा ध्यान दिने ।
हैजाको शंका लागेमा अस्पताल गइहाल्ने ।
