१५ फाल्गुन २०८०, मंगलवार Tuesday 27 February, 2024

आन्तरिक विवाद चर्केपछि फुटको संघारमा जसपा : बाबुराम पक्षीय बैठक आज बस्दै

 मङ्लबार, असार २८ २०७९  

काठमाडौं । जनता समाजवादी पार्टी नेपाल (बाबुराम पक्ष) को केन्द्रीय समितिको विस्तारित बैठक आज बस्दैछ । जडिबुटीको रोयल जडीबुटी पार्टी प्यालेसमा आजदेखि बैठक बस्न लागेको हो ।

जसपा (बाबुराम पक्ष) का केन्द्रीय कार्यकारिणी सदस्य गंगा श्रेष्ठका अनुसार बैठकको तयारी पुरा भएको छ । आज ११ बजेदेखि सुरु हुने बैठकका लागि केन्द्रीय सदस्य र परिषदका सदस्यहरु काठमाडौँ आइपुगेका छन् ।

केन्द्रीय सदस्यहरूका लागि बैठकमा सहभागिताका लागि पाँच सय रुपियाँ शुल्क तोकेको छ ।

बैठकमा जसपाका संघीय परिषद् अध्यक्ष डा.बाबुराम भट्टराईले समसामयिक राजनीतिक तथा पार्टीको विषयवस्तु समेटेर कार्यपत्र प्रस्तुत गर्नेछन् । ती कार्यपत्रमा छलफल हुने बताइएको छ ।

पार्टीका आन्तरिक विवाद चर्केपछि जसपा फुटको संघारमा पुगेको छ । जसपा उपेन्द्र यादव पक्षले पनि केन्द्रीय समितिको बैठक बोलाएको छ । सो पक्षको बैठक भोलिदेखि वीरगञ्जमा बस्नेछ ।

यी दुई समूहको छुट्टा छुट्टै बैठकले जसपाको भविष्य निर्धारण गर्नेछ । पार्टी एक रहने कि विभाजन हुने विषयमा यी छुट्टा छुट्टै बस्ने बैठकले तय गर्ने बताइएको छ । यद्यपि पार्टी विभाजन हुनुहुँदैन । पार्टीमा छलफल गरेर यसलाई एक ढिक्का बनाउनुपर्ने पक्ष पनि बलियो हुँदैछ ।

आज जसपाका धेरै नेता कुनै पनि बैठकमा नजाने भएका छन् । उनीहरु दुबै पक्षलाई मिलाउने अभियानमा लाग्ने भएको छ ।

प्रतिक्रिया सबै