२८ चैत्र २०८०, बुधबार Wednesday 10 April, 2024

भीम रावलले एक्लै ‘रोष्टम कब्जा’ गरेपछि…

 बुधबार, साउन ४ २०७९  

काठमाडौं । नेकपा एमाले सांसद भीम रावल अमेरिकासँग एसपीपी सम्झौता नगर्ने पत्र पठाउन सरकारलाई रुलिङ गर्न माग गर्दै रोष्टममा उभिएका छन् । बुधबार प्रतिनिधिसभाको बैठकमा रोष्टमबाट नेता रावलले सरकारले अमेरिकासँग एसपीपी सम्झौता नगर्ने निर्णयको कार्यान्वन गराउने बारेको पत्र अमेरिका पठाउन रुलिङ गर्न माग गर्दै रोष्टम कब्जा गरेका हुन् ।

बैठकमा ग्लोबल ग्रीन ग्रोथ इन्सिच्युटको सहभागीतामुलक सदस्यका रुपमा स्वीकृत गर्ने सम्झौताको प्रावधानमाथिको छलफलमा सहभागी हुने क्रममा रावलले एसपीपी सम्झौताको विषयमा प्रवेश गरेर सभामुखलाई रुलिङ गर्न माग गरेका हुन् ।

सभामुखको ड्यासमा अध्यक्षता गरेकी सत्या पहाडीले पटक-पटक आशन ग्रहण गर्न आग्रह गर्दा पनि रावलले मानेन् । ‘नेपाल सरकारलाई गाह्रो प¥यो, अमेरिकालाई पत्र पठाउन रुलिङ गर्नुप¥यो । प्रतिनिधि सभाको यो बैठकले सहयोग गर्नुप¥यो । सरकारले रद्ध गर्ने निर्णयको स्वागत गर्छु । प्रतिनिधि सभाको ताकत सरकारलाई देखाउनुप¥यो’, उनले भने ।

रावलले माग गरेपछि केही सांसदहरुले नियमापत्ति जनाए । साथै केही सांसदहरुले माइक काट्न सभामुखलाई आग्रह गरे । तर पहाडीले माइक नकाटी सम्बन्धित मन्त्रीलाई ध्यानाकर्षण गराएको बताउँदा पनि रावल रोष्टमबाट झरेनन् ।

सभामुखको ड्यासमा रहेकी पहाडीको जोर नचलेपछि सभामुख अग्नि सापकोटा ड्यासमा आइपुगे । रावलले उठाएको विषयमा ध्यानाकर्षण भएको बताउँदै उनले उठाएको कुरा विषयान्तर भएको बताउँदै रावललाई आफ्नो सिटमा गएर बस्न भने । तर सांसद रावल पछि हटेनन् । उनले सरकारलाई रुलिङ गर्दै एसपीपी सम्झौतामा सहभागी नहुनेबारे अमेरिकालाई पत्र लेख्नका लागि रुलिङ गर्न माग गरिरहे । केही सिप नलागेपछि सभामुख सापकोटाले १५ मिनेटका लागि बैठक स्थगित गरे ।

प्रतिक्रिया सबै