९ श्रावण २०८१, बुधबार Wednesday 24 July, 2024

निहारिकाको विषयमा राष्ट्रपतिद्वारा कानुनमन्त्री र महान्यायाधिवक्तासँग छलफल

 शनिबार, साउन २८ २०७९  

काठमाडौं । न्याय माग गर्दै आमरण अनशनमा रहेका निहारिका राजपूतको विषयमा राष्ट्रपति विद्यादेवी भण्डारीले चासो दिएकी छन् । आज कानून मन्त्री गोविन्द बन्दी र महान्यायाधिवक्ता खम्बबहादुर खातीलाई बोलाएर उनले यस विषयमा ध्यानाकर्षण गराएकी हुन् ।

निहारिकाले शुक्रबार राष्ट्रपति भवन शीतल निवास अगाडि आत्मदाह प्रयास गरेकी थिइन् । तर, प्रहरीले हस्तक्षेप गरी उनको ज्यान जोगाएको थियो ।

९ दिनदेखि आमरण अनशनमा रहेकी निहारिकाले आफूमाथि ‘बलात्कार गर्ने’ व्यक्तिलाई पक्राउ गर्नुपर्ने र बच्चाको डीएनए टेस्ट गर्नुपर्ने लगायतका माग राखेकी छन् ।

निहारिकाको मुद्दाबारे आज राष्ट्रपतिसँग कुराकानी भएको कानून मन्त्री बन्दीले बताए । ‘राष्ट्रपतिज्यूबाट चासो व्यक्त भएको छ । हामीले मुद्दाको विषयमा अवगत गराउँदै यसलाई गम्भीरतापूर्वक लिएर आवश्यक पहल गर्ने प्रतिबद्धता व्यक्त गरेका छौँ,’ उनले भने ।

मन्त्री बन्दीले निहारिकाको मुद्दामा फैसला गर्ने न्यायाधीशविरुद्ध कारबाही प्रक्रिया अघि बढिसकेको पनि अवगत गराएका थिए । राष्ट्रपतिका सञ्चार सल्लाहकार टिका ढकालले राष्ट्रपतिको मुख्य सल्लाहकार नै सरकार भएकाले विभिन्न सन्दर्भमा कानून मन्त्री र महान्यायाधिवक्ता परामर्श गर्ने प्रक्रिया नियमित भएको पनि बताए ।
‘आजको भेटमा निहारिकाको सन्दर्भमा राष्ट्रपतिबाट गम्भीरतापूर्वक चासो व्यक्त भएको छ,’ उनले भने ।

स्रोतका अनुसार निहारिका अनशन बस्नु अगाडि पनि राष्ट्रपतिको कार्यालयमा उनको मुद्दाका विषयमा विभिन्न च्यानलहरूबाट जानकारी आएका थिए । त्यसमा राष्ट्रपतिले महिला आयोगलगायतका सरकारका विभिन्न अंगहरुसँग कुराकानी गरेर यस मुद्दालाई न्यायपूर्ण निष्कर्षमा पुर्‍याउन आग्रह गरिरहेकी थिइन् ।

प्रतिक्रिया सबै